Thuneihna hi tute kut zâlah nge a tlâk? Eng vangin nge ka pa Thanga aiin ka pu Hrângkapa kha a thu zawk tlat a, a pawimawh bik tlat? tih hi hman aṭangin chhânna pêk a, zawn chhuah an lo tum tawh ṭhin. Democracy – mipui rorelna kan tih chhûngah pawh hian mipuite’n ro an rel tak tak em, mipuite’n thutlukna an siam tak tak em? tihte hi chîk taka en a ngai. Kum 2019 khan Modi-a sawrkar chuan CAA, 2019 an pawm a, India ramah dodâltu tam tak an awm a nih kha. Mahse, CAA kha sût leh a ni chuang em? Hnai lo e! Heng politician-te hian mipuite aw hi chu mêna thlâk an tum hram hram ṭhin. State leh Union budget an siamahte hian mipuite’n dêk pawh kan tingam em? Ngam pawh ni ila awmzia a awm ang em? Bang biâk kân chauh kan ni dâwn tihna a ni mai em, tihte hi kan ngaihtuah ngai em le? Hêng thuneihna inchherchhuan dân hi hrethiam turin chîk taka kan ngaihtuah a ngâi a, kan hrîat thiamna turin hmanraw pakhat C. Wright Mills-a ‘Elite theory’ hi han hmang chhin dâwn teh ang.
He theory hian a tarlan tum ber chu khawtlâng emaw, ram emaw inrelbawlnaah hian, mipuiin thuneihna inang kan nei vek lo. Thuneihna tak tak chu mi tlem tê, thiamna nei sâng bîk, hausa bîk, leh hruaitu dinhmun chelhtute kutah a infawm khâwm vek, tih hi a ni. He ngaihdan hi Vilfredo Pareto leh Gaetano Mosca-te khân an lo vawrh chhûak tawh a. Mahse, kum 1956-a American sociologist C. Wright Mills-a’n The Power Elite tih lehkhabu a tihchhuah khân, vawiina democracy kalphungah hian mipui lakah thuneihna leh mawhphurhna awm lovin, mi tlem tê kutah thuneihna a awm thei a ni tih chiang takin a rawn tarlang. Tunlai kan khawvel thil thleng – democracy hmang anga lang si, mahse mi tlem tê (Mi hausa, politician leh khawtlâng mita ṭha leh zahawm) kuta thuneihna innghat tlat hi kan hriatthiam a ngâi rêng asin.
Pu Mills-a Power Elite Chu
C. Wright Mills-a’n The Power Elite a rawn tarlan hian, thuneihna hi hmun thumah a ṭhen a. Chûngte chu: Sumdawnna lian enkawltu te, ram hruaitu te leh sipai hotu lian leh ral rel thiamte an ni. Mills-a ngaih dIan chuan heng pâwl pathumte hi eng tik lai mahin an inmual vawm hran ngai lo, an mawngzawm tlat. Hêng mite hi mi thuhmun, hmun hrang hranga thuneihna chelh tlat an ni.Entirnan, sawrkâr hrûaitu hlui kha sumdawnna lian (Corporate) board member-ah a ṭhu leh a, sipai hotu châwl tawh kha ralthuam siam chhuahna hrûaituah a ṭang leh ṭhin. Heti ang hian thuneihna chu a vir kûal reng. An fate lehkha zirna hmun a inang a, hmun nûam leh changkâng takah an kal tlânga, an innei tawn a, chuvang chûan an ngaih dân leh an duh dân a inang tlâng vek ṭhin. Pu Mills-a thlîrna tlângah chuan mipui hian vote chu kan thlâk ve ngei, mahse a tak takah chuan democracy-ah mipuite hi thutlûkna siamtu kan ni emaw kan intih laiin, infiamna thlîrtu ang chauh kan ni. Infiamna chu a khelmûal (political arena)-ah mi hausa, politik khelmûala che tla te, pâwl hruaitu, sipai hotu leh khawtlang mita mi zahawm leh challangte’n (Power Elite) an khêl a, mipuite chu a pâwn lam aṭanga lo au leh lo thlîrtu kan ni ve chauh.
Billionaire-te’n Lal Lai Par An Tlanna America Ram
America dinhmun kan thlîr hian C. Wright Mills-a thlîrna kha a takin a thleng tih kan hmu thei. Kum 1950 chho ai khan tunah hian hausa leh rethei inkâr a zâu tawh zâwk a. American Sociologist Heather Gautney-i’n Jocobin Magazine-a a tarlan dânin, America-ah billionaire pathum chauh hian ram mipui retheite chan tur chanve (50%) aia tam sum leh pai an hum khâwm ang a ni a, hei hi a ni e Mills-a sawi mi hausa tawntawte thuneihna chu! January ni 6, 2021-a Capitol Hill luhchhuahna thleng pawh kha, mipui lungawi lohna leh anmahni nunah thuneihna nei lo anga inhrîatna (alienation) vanga thleng ni mah se, heti ang lungawi lohna hi elite dang (politician leh media)-te’n anmahni hlâwkna atan an lo pusum têl leh. Media lian tak takte hian mipui ngaih dân an chherchhûan kûal vêl a, chuvang chûan mipuite chu duh thlang thei tûra inngâi siin, power elite-te duan kual sa chhûngah chauh an tâl a ni lek fang.
India Rama Thuneitute
India ram democracy-ah hian C. Wright Mills-a Power Elite theory hi chîang takin a hmuh theih a, a bîk takin thuneitu leh sumdâwng lian (corporate) inthlun zawmna (crony capitalism) hi a thûk hle. Pu Mills-a’n ram hruaitu leh sumdawng lian inthlunzawm tlatna (interlocking directorate)a tih nen a-thlum-a-al-ei-za an ni. Electoral Bonds chungchângah khân Common Cause leh CPIL te’n Supreme Court-a thu an thlen (W.P.(C) No. 266/2024) dânin, sumdâwng liante’n political party-te sum an pêk dân hi “Sum ka pe ang che a, project min pe rawh” tiin bang phênah inremna (Quid Pro Quo) an siam ṭhin. Common Cause India-a State Bank of India (SBI) tarlan dânin sum tam zâwk hi party lian hnênah lûtin, sawrkar project lian leh licence-te chu chûng sum petute hnenah bawk a lût leh ṭhin. Hei hi Oxfam India Survival of the Richest report (2023)-in India rama mi hausa 1% hian ram mipuia rethei dinhmuna dingte chan tur 50% aia tam sum an kawl khâwm tih a tarlan nen a inhne rem hle.
Common Cause (2019) data-in a tarlan dânin, Supreme Court judge 79% chuang hi upper caste an ni a, media lian tam zawk pawh corporate (Reliance/Adani) leh hêng chhungkaw tlem tê kutah hian a awm vek a ni. Tin, officer lian (IAS/IPS) leh sipai hotute (S. Jaishankar, Hardeep Singh Puri, Ashwini Vaishnaw adt.) pension hnua politika an luh zut zutna hian, thuneihna chu hmun pakhata vir kûal reng a nihzia a ti chiang. Hêng kan tarlan tâkte hi mi tlem tê kuta thuneihna awm vawn himna hmanrua structural inequality kan tih — khawtlang inrelbâwlna, dân leh hrai, leh institution (sawrkar, zirna in, leh sumdawnna) hrang hrangte’n mi tlem tê tâna hlâwkna leh mi tam ziawk tana harsatna an siamna kalphung leh sakhat tak awm tlat chu a tichiang thei ang.
India ram hi khawvel economy-ah a sIang hle a, mahse hei hi ‘Growth without Development’ kan tih, hmasIawnna hmingpu si mipuia thleng si lo a ni mêk. Economy kan sawi hîan sawrkâr hian Macro-Success emaw GDP (Gross Domestic Product) – ram chhûng sum lak luh zawng zawng chauh emaw a en ṭhin. India ram hi khawvel economy-ah a lian ber pangana (5th largest economy) a ni kan tih hian ram hausakna chu a pung ngei mai, mahse chu hausakna chu mipuia sem rûalna emaw thuneihna (economic power) tak tak emaw a awm lo, chu chu mit ngêia hmutu, a taka temtute vek kan ni. He Macro-Success-ah hian India ram tan mi hausa tawntaw an lo piang a, billionaire thar pêkin an awm ta. Rorêlna chu an koki-ah a chûang a, an hmingah chûan mipui nâwlpui chanai ei raltu chak-a, chatuana ram thununtu an la ti dâwn si a. An ram a zâu zel a, an ram zauhah chuan mipui nâwlpui inhlawhfâknain tâwpintai a nei lo ang. Ni e, corporate profit a sân avângin GDP a vawrh sang ngêi alawm. Mahse, micro-failure lamah erawh mipui vantlâng, lo neitu leh inhlawhfate lâk luh (per capita income) a pung ve lo, thil man a sân zel (inflation) si avângin mipuite chu an rethei tual tual zâwk a ni.
Corporate Colonialism leh DuhAmbani: Zoram hmabâk hi engnge ni ang?
Vawiin kan Zo tlang ram nuam dinhmun thlîrtu tân zawhna lian tak chu – kan sawrkar hi mipui thlan tlin ni mah se, a phênah hian mi tlem tê hausa tawntaw, C. Wright Mills-a’n ‘Power Elite’ a lo tih tâkte dâwi âtna hnuaiah kan tâl mek a ni lo maw? tih hi a ni. Khawvêl leh ram tân pawha sulhnu nei lêm lo mi hausa tawntaw fapa piancham lawmpuinaa kan sawkâr hrûaitu leh ṭhalâite fatu leader-ah an ṭang ta mai hi mit a va tikham em! Piancham an lawmpui chhan hi sawi ngai loin a chhan kan hrethiam ṭhup ania. Mi hausa mawng lîak duhûte hi literachar-a ṭhahnem ngai inti cafe pakhat neitu te, ‘Zoram thar din kan tum e’ titûte zînga mite leh hnam tâna ṭhahnem ngâi inti pâwl ṭhenkhat hrûaitute fatu-ah an ṭang ta mai hi a lungchhiatthlak! An zahpuiawm! Zak miah lo a, an hming faka rawn la lâm duh lah bo lo.
Hêng thil thleng hi corporate hoin sawrkâr an thununna (corporatocracy) ram kan zawh ṭan a ni tih lantîrtu a ni. Mizoramah hian ‘DuhAmbani’ (Duhoma + Ambani) kalphung, sawrkar hruaitu leh sumdawng lian (Reliance/Ambani) inmawngzawmna a thlen chuan hmasâwnna hming hmanga ram chhuhsakna (land grab) hi an hlawhtlinna hmanrûa a ni dâwn tih hi thil chîang reng a ni.
British-American professor David Harvey-a’n ‘Accumulation by Dispossession’ a lo tih, corporate-te’n an hlIawkna atIan mipui vantlâng ram leh thil neih lâksak hi an kalphung, thawnthu hlui an inhrilh chu a ni reng ṭhin. Adani Group-in Chhattisgarh rama coal mining tûra an ram ṭha lai Hasdeo Arand an tih sawrkar thurûalpuia an lâksak kha sual entîr nân min pui tûra ṭha tak a ni ang. Tualchhûng mi Adivasi-te ram an lâksak bâkah, thing nuai chûang an kih sak. Sawrkârin ‘No-Go Zone’ tia a lo pûan tawh hmun pawh Adani hlâwkna tur a nih avangin dân her danglamin an rûnlui a nih kha. He ram neihsakna tenawm tak hi Mizoram forestry leh bamboo sector-ah Reliance leh Adani-te kan luhpui chûan kan hmachhawn ve mêk tur chu a ni tih hi engtin nge an mawng lîaktute hian an phat mar ang le? Kan ram leh hnam humhalhtu Sixth Schedule rights-te hi an sum thiltihtheihna hmangin an rawn rûn thei a, vawiina lo neitute hi anmahni ram neitu ni tawh loin sumdâwng liante hnuaia inhlawhfa (wage laborers)-ah an chhuah hma loh chu an chawl dawn lo, chumi hre chîang turin corporate-te chêt dân sulhnu he khawvel chanchina hmuh tur tam tak hian a tichiiang tâwk tawh vîau e.
Corporate ho hian mi an rûnna hmanrûa atân thil thlâwna sem leh ṭanpuina (charity) hi an Ak47 hman thîam berte zînga mî a ni. He hmanrûa hi Greek hote’n Troy an luh chhuah theihna tura Trojon Horse an hlan ang kha a ni a. Tunah pawh sum leh thilpêk chi hrang hrang, 4×4 Camper leh rimâwi hmanrûa donation hmangin YMA leh Kohhran hrûaitute an thlêm lungawia, he soft power dawi âtna hîan sawrkâr hrûaitu leh ṭhalâite a chhâi vêl mêk. Ambani fapa piancham lawmpuina poster leh video reels hîal siama kan Minister-te ngei pawh an phi cheng mai hi rilru neihsâkna rapthlâk tak a va ni êm! Tin, India rama news agency lian leh media lian (PTI, ANI, Times of India, Mid-Day, adt.)-te chu he campaign-ah hîan an phusa hle. Media hi thudik pûangtu (fourth estate) ni loin, corporate ho advertisement leh PR hmanruaah an chang zo tawh tih târlangtu a ni hîal lo maw?
Bible-in “Tangka sum ngainat hi sual tinrêng bul” a tih angin, patling ṭhan kin tawh sum hmanga dâwi mêktute hian hmasâwnna ni loin mi tlem tê, khawtlâng mita mi zahawm leh challang (elite)-te kuta hlâwkna luhna leh mipuite thuneihna nuai bona an rawn paipawn tel ngei ang. Tin, corporate ho hian dân hi mipuite thunun nan chauh an hmang. Anmahni erawh dân chungah an lêng thung. India sawrkar hian Reliance leh Adani ang corporate lian ho bat nuai tam tak chu Non-Performing Assets (NPA) hming hmangin a ngaihdamsak (Debt Write-off) a, mahse mipui nâwlpui retheite loan erawh an in leh lo chhuhsak hial khawpin an nawr tlat si. Ruatfela Nu-in DuhAmbani chungchang a ziahnaa a târlan ang khân sal neihna kha eng tik emaw lai kha chuan ram tinah dan anga phal a ni ṭhin. Zo fate pawh ‘Bawi’ neih kha kan hnam dâna phal a ni. British sawrkâr khan dân angin an lo pawm bawk. Mahse, dânin a phal avâng khân mihring leh mihring inlei leh inhnehchhiâhna kha a dik tihna a ni lo. Chuti ang bawk chuan, corporate lian ho (Adani, Reliance, Nestle, adt.) hian mipuite ram leilung rah chhuah (resources) laksak nan hian dân hi hmanruah an hmang thiam hle. Sawrkâr hnên aṭangin permit leh license an la a, Environmental Clearance an nei bawk ang. Mahse, khaw tual mite duh thlanna leh an neih chhuhsakna a nih tlat avângin, dân chhûngah thiam chang mah se, an dik tihna a ni chûang lo. Mihring dik chanvo (human rights) aiin sumdâwn nâna hlâwk (profit) an dah pawimawh hmasa tlat.
Sal nei hun lai khân, sal neitu khân a sal kha “In leh lo ka pe a, ei leh bar ka pe,” tiin thiam a inchan ṭhin. Mahse, sal khân duh thlanna zalên a nei lo. Vawiina corporate hoin “Hmasawnna kan rawn thlen ang, inhlawhna kan siam ang,” an tih hian, tualchhûng mipuite chu dawi ât an tum tih hi beng nei chuan hre rawh se!
Mizoram economy hmasawn nân corporate lian ho thawhpui tura rawtna hrang hrangte hi chîk taka a dik tâwk lohna hai lan a ngai. Khai mah aw, hei hi ngaihtuah tel ang hmiang: Agriculture leh Food Processing-ah Adani Wilmar leh Nestle-te kan lawm luh chuan lo neitute tihhmasâwn aiin anmahni hlêp (Monopoly) an thlîr zâwk dâwn. Lo neitu kuta thliai man bituk theihna an lâksak a nih chûan tualchhûng economy an tichhe zâwk ang. India ram hmun dangah phei chûan contract farming hmangin loneitute chu anmahni ram ngeiah hlawhfa (wage laborers)-ah an chhuah a ni hawt mai. Lo neituin thlai man a bituk thei tawh lo, corporate-ho bituk sa, a tlâwm thei ang bera an hralh a ngai tawh ṭhin.
Forestry leh Bamboo lama Reliance leh Aditya Birla-te koh luh hian ‘Green Economy’ hming hmangin kan ram neitu nihna nei tawh loin, an supply chain tâna raw materials petu chauhah min chhuah a hlauhawm hle. Hei hi ‘Ecological Imperialism’ an tih leilung hausakna hmanga hnehchiahna chu a ni.
Renewable Energy lama Adani Green leh Tata Power-te thuneihna pêk a nih hian tuichhia leh boruak hi mimal sumdawnna hmunah an chantîr ang a, kan tui leh êng rin nan pawh corporate thuneihna kan rin a ngâi tawh dawn a, chu tak chu thuneihna mi tlem tê kuta awm, mipui hnên thleng phiak tak tak lo kan tih chu a ni.
Infrastructure leh Logistics hma lâkna L&T leh GMR ho hnuaiah hian corporate tân kawng a sial avangin mipui ram neihsakna a rawn thlen zâwk ṭhin. South America leh Africa ram tam takah corporate-ho hian kawngpui lian tak tak an sial a, mahse chu chu mipuite tâna ṭangkai a nih aiin, ram hausakna dâwt chhuahna hmanrûa (extractive infrastructure) a ni zâwk. Mipui ram neihsakna (land acquisition) rapthlâk tak a thlen phah ṭhin bawk. Tin, Healthcare leh Tourism lam thlengin Mizoram hi mi hausa tâna nawmsakna hmunah chan a ni ang a, tualchhung mite tân erawh tlawh phâk loh ‘Elite zones’ a thleng palh ang tih hi a hlauhawm.
Hêng hma lâkna zawng zawng hian State rethei zawkte’n corporate an rin chhan tlatna (Dependency Theory) a rawn hring chhûak zual sauh ang a, corporate ho hi eizawnna siâmtu aiin kan ram leilung leh ram mipuite dikna chanvo rap bettu, state budget thununtu an ni zâwk ang.
Tlipna: Elite Game Atâ Harh Chhûakin
Kan ram leh hnam humhalh a ngâi kan ti a, chim ral kan hlâu a, kan hnam nihna ei chhetu leh pawisawitute ngaihtuahin kan phili buai chûl ṭhin. A tâwpah kan thlabâr lungphânna leh kan lungawi lohna zawng zawng chu kan kawtkaia inhlawhfa tura lo lût keini ang thoa an rama hnathawh tur tlachham Bhaga vâi leh Silchar vâite, leh keini ang thoa ram hruâitute rorelna dik lo buaina zakhua hmachhawn kan ram rawn bêl mêktu kan unau raltlânte chungah kan bun ṭawk a, anni chu kan ram tâna mi hlauhawm ber angin kan hmu a, harsatna hmachhawn inang, thuneihtute tihkâwi kâwia awmte ve ve kha kan inbei kan inbei a nih chu! Heti anga puh mawh tur kan hâi kual vêla mipui nawlpui ve ve kan inbei hi khawtlâng mita mi zahawm leh challang (elite)-te’n an thuneihna an vawn him nân leh mipuite’n kan hmuh loh lama sum dâwt chhuahna tur atâna an game khelh a ni zâwk. Mipuite’n Bhaga vâi leh raltlânte kan lo buaipui cheng lai hian, khawtlang mita mi zahawm leh challang (elite) ho chuan kan ram dâwt chhuak tura thiltitheihna nei zâwk corporate colonialism chu an lo hmachhawn duh miah lo thung a nih mêk hi!
Tunah lêm, ram leh hnam hmangaihtu inti leh ram leh hnam humhalhtu intite hian, hêng corporate rûnna leh leilung rah chhuah (resources) min neihsak theihna hi eng vângin nge an hmuh mawh theih hauh loh? An hmu mawh lo chauh pawh ni loin, DuhAmbani kalphung hmanga thuneihna leh hlâwkna an insem vang a ni lo maw? Kan Zo tlang ram nuamah hian mipuiin thuneihna dik tak – political power leh economic power chu kan nei tak tak em? Kan neih tak takna turin hêng ram tâna thawk intite hian an bei em? Thudik chu, an bei lo a nih chuan mipui nâwlpui hmasawnna leh dam khawchhuahna tur an ngaihtuah tak tak lo a ni ang. Mipuite hi tu game khelhah nge kan thih fo a, kan nun suar ang a chim fo ṭhin le?
He khawtlâng mita mi zahawm leh challangte (elite) game – mi tlem tê kuta rorelna vir kual vêl ata hi kan harh chhuah a hun tawh tak zet. Thuneihna hi pâwl leh party emaw, corporate emaw ta a ni lo, mipuite ta a ni a, chumi chu kan sual chhuah a ngâi ta, vawiinah hian. Khawtlâng mita mi zahawm leh challangte leh sawrkar hruaitute hian kan dikna chanvo (politik leh economic-a thuneihna kan neih) hi min hriat chiantir an duh lo. Kan hriat chian lohna hi an tân hamṭhatna a nih tlat avangin. Mipuite hi thuneihna nei lo (Powerless) anga kan inngaihna hi hêng mite chakna a ni zâwk tih hriain kan zain harh ila, ram thar – mi tlem tê tâna hmasâwnna leh thuneihna fawng an chelhna ni lo, kan zavâia mi pawimawh kan nihna, kuthnathawktu leh khaw tuâl mite tâna zalênna hmun chu i siâm ang u.
