Kum 2006-a din a nih atangin, Patanjali Ayurved, ‘Patanjali’ ti a kan hriat tlanglawn, Balkrishna leh Ramdev-te company chuan India rama inchhung sekrek mamawh atanga ramhmul damdawi chenin mitin ban leh hman a ni har lo hle a. Kum tam a rial hmain sumdawnna thang duang leh inzarpharh chak ber pawlah a inhlangkai dawrh mai. BJP sawrkar nena inhne hnai tak niin, an company siam leh zawrh thilte tlangzarahna hunah pawh Union Minister-te hial chet chhuah tir theitu ni mah se, sumdawnna an kalpui danah te, an siamchhuah thenkhat mipui tana him tawk lo chungchangah te sawisel leh khap sak an hlawh chho malh malh thung. An fakna (advertisement) siam dan leh inchhal (claims) danah te mipui bum tumna leh dan kalh thil awma puh niin, Court beng hial a thleng ta fo mai. Huang an zauh rualin hmun tinah dodalna an tawk mek zel niin a lang.
Dawt hmanga mipui bum leh dan pal zutna
Financial Express tarlan danin, October 2024 khan Kerala-ah Balkhrishna, Ramdev leh Divya Pharmacy (Patanjali sumdawnna hmanrua ber) te lakah F.I.R. thehluh a ni a. Zirchianna tel lo leh dawt hmanga an ramhmul damdawi siam chhuah zuar leh fakna siam (advertise)-ah puh an ni.
He’ng damdawi-te hian natna hrang hrang – zunthlum, thisen sang, Covid-19 leh a dangte tidam theia chhalin fakna an tidarh nasa hle a. Zirchianna leh enchhinna awm lo damdawiin natna a tidam thei anga chhal leh fakna siam hi Drugs and Magic Remedies (Objectionable Advertisements) Act, 1954 hnuaiah dan kalh tlat a ni. He’ng damdawite hi a nihna baka fak leh chhal hian tunlai damdawi leh thiamna hmanga inenkawlna (Allopathy) hnualsuatna leh hman duh lohna hial a thlen nasain, tunlai damdawi hmanga enkawl mamawh tak takte nunna dinhmun hlauhawmah a awm phah tih hriain mithiam leh daktawr-te lu a hai hle a ni.
January ni 16, 2025-a court a inlan tura koh an ni chunga tumah an inlan loh avangin, Judicial First Class Magistrate II (Pallakad, Kerala) chuan he’ng mi pathum – Balkrishna, Ramdev leh Divya Pharmacy-te man theihna a tichhuak rup mai.
He thubuai hi Ramdev leh a company hian an thiltihtheihna leh hmingthanna tangkaia hmanga, an sumdawnna zauhna kawnga mipui bum leh dan palzuta puh an nihna hmasa ber a ni lo.
Covid-19 damdawi ‘Coronil’ leh Supreme Court
Kum 2020-a India-in Covid-19 a beih a, mi tam tak nunna derthawnga a awm lai khan, “zirchianna leh enchhinna paltlang hmasa ber” tiin Covid-19 damdawi ‘Coronil’ chu siam chhuakin fakna pawh an tidarh nasa hle a. He damdawi mipui lei theih tura hawnna hunah hian Union minister pahnih – Harsh Vardhan leh Nitin Gadkari te an tel nghe nghe.
August 2022-ah Indian Medical Association (IMA) chuan zirchianna leh enchhinna tel lo damdawi zuar a, natna tidam thei anga an chhal leh fakna tihchhuah chungchangah Supreme Court-ah Patanjali lakah PIL a thehlut a. Hemi mai bakah hian Ramdev-an tunlai damdawi leh thiamna (allopathy) hmanga inenkawlna hmusit taka a thawh tak tak loh zia leh a ramhmul damdawi a thawh zawk zia a sawina te chuan ngaihmawh a hlawh hle.
Supreme Court-in a ngai thutak hle a. Business Standard tarlan danin, November 2023 khan Court chuan Patanjali chu thuziktluak lo hmanga fakna siama an tidarh leh a nih chuan sum tam tak chawitirah a vau a. Supreme Court thu meuh ngaipawimawh loa fakna an tihchhuah luih zel avangin February 2024 khan Court chuan fakna tihchhuah a khap lailawk sak bakah, Balkrishna leh Ramdev te chu Court rorelna zawm lo leh zah lo (Contempt of Court) ah a puh bawk. Patanjali chuan Court thupeknain vantlang hriata ngaihdam dilna (Public Apology) an chhuah ta hial a ni.
Scheduled Caste (Dalits) ram chhuhsaka puhna
Hindu sakhuaa hnam hnuaihnunga ngaih, hmasang atanga vawiin thlenga en hran leh awp behna tawk “Khawihthiang loh (Untouchables)” emaw “Dalits” emaw ti-a hriat thinte hi India Danpui hnuaiah Scheduled Tribe te ang thoa humhim an ni a. ‘Scheduled Caste’ tiin India Danpuiin a sawi ve thung a ni.
News Laundry-in zirchianna a tihchhuah danin, Uttarakhand state-a Haridwar district thingtlang pakhat Teliwala-ah chuan, land reform kalpui a nih laia he hmuna cheng Schedule Caste-te tan sawrkarin ram a theh tam zawk chu Patanjali kutah a lo awm reng tawh tih hmuchhuah a ni heu mai! He hmuna cheng mek tam tak chu ram nei lo emaw, Patanjali hnuaia thawk emaw an ni fur a, eizawnna dap tura an pi leh pute ram chhuahsan ngai ta te pawh an awm thu a tar lang. Scheduled Tribe-te ang thoin, dan humhimna hnuaiah Scheduled Caste-in Scheduled Caste vek hnenah lo chuan ram a tiral thei lo a. Chutiang tur pawh chuan bigha 18 aia zau ram nei chauhin district emaw sub-divisional magistrate emaw phalna chauhin a hralh thei tih a ni.
Zirchiannaa a lan zel danah Patanjali chuan, dan angin chu’ng mite ram chu neih emaw lei emaw phal sak ni lo mah se, dan hnunglamah kua hreuhin, he’ng thingtlang mite hi a neitu nihna laksak chuang si loin an ram chu a leisak ta thin tih hriat a ni. He’ng mite hian an chhungkhat laina leh hmelhriat hming te hawhin Patanjali tan ram an lei ta zel a, an ram hralh duh lotute pawh nawr luihna an tawh hial thu tarlan a ni.
An mahni ram ngeiah a hming chauha neitu nihna neiin, Patanjali tan an thawk a, an pi leh pute atanga an rochun ram ngeiah an duh ang thar thei loin retheihna salah an tang mek a ni.
Mimal kut atanga ram an laksak piah lamah hian Gram Sabha (Village Council) ram pawh ‘Patanjali Yogpeeth Trust’ atan pek (donate) tumna kalpui niin, mipui dodalna avang chauha chhanhim a ni ta hram a ni.
Hemi kum vek hian Aurangabad thingtlang pakhatah dan phal loh bawkin Patanjali chuan Village Council ram zau tak chu a ta neih hman a, mipui dodalna avang bawkin tam tak humhim ni mah se, ram zau tak (bigha 150 lai) chu Patanjali kutah awmin, sakhuana thil tihna hmunah an chantir niin a ram mi ten an sawi.
He’ng dan lova ram inneihsak chungchangah hian thuneituten ngawih an chuh a ni mai lova, Pantanjali-in dik lo taka ram a neihna kawnga nasa taka puitu an ni zawk tih hriat a ni. Ramdev sawiseltu nih chu amah zuitu leh be-tute tam tak hmelmaa siamna a nihna hriaiin, tupawhin ngawih an thlan zawk thu Haridwar press club member pakhatin a sawi.
Mizoramah Oil Palm leh Patanjali
Kum 2025, Jannuary ni 23-ah Patanjali palai ten Mizoram Chief Minister Lalduhoma hmuin, Patanjali Foods Ltd. chuan Liapha, Lawngtlai-ah oil palm mill an hawn tur thu leh, kum khat chhunga hawn hman ngei an inbeisei thu an thlen. (PTI)
National Mission on Edible Oils-Oil Palm (NMEO-OP), Modi-a sawrkarin kum 2021 atanga a kalpui hma hian, kum 2004 daih tawh khan Mizoramin oil Palm hi a lo hmelhriat tawh a. Kan tlang ram lo neih dan (Jhum cultivation) avanga thing leh mau chereu nasa tak thlakna tur leh, Mizoram leilungin a thatpui dawna ngaihna a awm avang te, lo nei mite tana ei leh bar zawnna hlawk leh rintlak zawk a nih beiseina avanga kalpui ni-a sawi a ni.
December ni 2, 2004-ah Mizoram Legislative Assembly chuan Mizoram Oil Palm (Regulation of Production & Processing) Act, 2004 chu pawmin, he dan hnuaiah hian sawrkar leh private company te thawk ho a, oil palm chin leh sawngbawlna tur dan siam a ni. Sawrkar (Agriculture Department) thawhpui atan he’ng company – Godrej Agrovet Pvt.Ltd., 3F Oil Palm Agrotech Pvt. Ltd. Leh Ruchi Soya Industries Ltd. te hi thlan an ni tih Agriculture Department, Mizoram website-ah tarlan a ni.
Mizoram University zirchianna, (Impact of Oil Palm Plantation on Rural Livelihood: A Case Study of Mamit and Kolasib District, Mizoram, North East India) atanga a lan danin oil palm chingtu tam zawkin an hlawkpui lo tih hmuhchhuah a ni a. Tin, Nature Conservation Foundation zirbingna chuan, tlang ram lo neih aiin oil palm chin hian kan ramngaw, nungchate leh leilung tan chhiatna a thlen nasat zawk tih a hmuchhuak bawk.
Kum 2019-ah Ruchi Soya company chu Patanjali in a lei a. Kum 2023 khan Frontline Magazine chuan 2004 atanga Mizorama Oil palm nghawng hrang hrangte chhui chiannaah, lei hriselna leh tui hna a tihchhiat nasat thu a tarlang. A phurh chhuah dan turah te ruahhmanna mumal tak a awm loh avangin oil palm thahnem tak a tawih ral nghek nghuk a, thlai danga inleh san tur pawha oil palm-in an ram lei a ei chhiat tawh thu leh, oil palm suat chu tih namai a nih loh avanga loneitute beidawnna leh manganna a tarlang bawk. He an harsatna zo zaiah hian Mizoram-a company awmte (Ruchi Soya – Patanjali, 3F leh Godrej) hian mawhphurna an lak that loh bakah, loneituten zangnadawmna an hmuh mumal loh thu tarlan a ni bawk.
Mizoramin oil palm a hmingthatpui lo hle chung hian, BJP sorkarin oil ei chi (Edible Oil)-a intodelh tura a beihna kawngah Hmarchhak ram tinah beihpui a thlak mek a, phurna thar nen Patanjali kaltlangin a hma aia nasaa hmalak tumna a awm chho mup mup a. Eng chenin nge kan ramngaw leh kan ram chungah thuneihna an neih dawm? Ei leh bar, sumdawnna hmanga chimralna leh Mizoram thehdarhna hmahruai a ni dawn em? Tih chu zawhna lian tak a ni.
Ramngaw chereu nasa lutuk venna atana duan, Forest Conservation Act, 1980 (FCA) chu kum 2023 khan tih danglam (Amend) a ni a. Supreme Court-in Godavarman case-a (kum 1996) thutlukna angin thing leh mau awmna hrim hrim, sawrkar chhinchhiah (Reseved or Protected) ni kher lo thlengin, ramngaw (Forest) anga chhal a, FCA hnuaia venhim hna thawh theihna zau tak a pek chu tihdanglam a ni ta a.
Dan tharah chuan sawrkar chhinchhiah loh ram (Unclassed Forest) te chuan venhimna an dawng tawh dawn lo. A pawi ber chu hmarchhak ramah hian danin a chhinchhiah loh ramngaw, thing leh mau leh nungchate tana pawimawh em em si hi a tam hle a. Mizoramah ramngaw za zelah 15.5 lai chu chhinchhiah loh (Unclassed Forest) niin, he’ngte hian venhimna an dawn tawh dawn loh mai bakah, hmasawnna hna thawhna leh thil dang atan awlsam taka hman theih a ni tawh dawn tihna a ni. Tin, he dan tharah hian ramri (International border) atang Km 100 lai mai chu ‘Forest Clearance’ ngai lova ram tana thil pawimawh hmasawnna ruhrel din na’n te, ral relna hmun leh adt. atana hman theiha siam a ni. Hei hian Hmarchhak ram zawng zawng deuh thaw leh, Mizoram pumpui a huam a ni. Central Sawrkarin tul a tih angin oil palm hmun a siam duh a ni emaw, sipai hmunpuiah a chantir duh a ni emaw, Mizoram hmun khawi lai pawh hmangin a siam thei tihna a nih ber chu! (Source: Mongabay, Frontiers in Ecology and Environment,2024)
He dan siam danglam hlawkpui hmasa ber tur chu sumdawng lian Patanjali ang te hi an lo ni ta niin ram veitu thenkhat ten an sawi. Ministry of Ayush chuan a official website-ah oil palm hi ram tana thil pawimawh leh ram hnuk khawih (National interest) a ni tih a tarlang a. Ram hnuk khawih hi sawifiah har tak leh eng chin chiah nge hriat har tak a ni a, kan hriat chian loh thil vek hmang chuan kan ram leh ramngawte chhuhsak theih kan ni lawi a! Min humtu dan lah chu tih chaklohin a awm duai duai mai si.
Hmasawnna duhawm tak tak a thlen rual hian, suma kan lei theih ngai loh tur kan ramngaw, tui hna leh nungchate kan chan hlen thei tih hriain, mithiam leh ramngaw leh nungcha humhalh duhtuten ralkhel dar an khawng ri mek a. Patanjali hnuhma leh oil palm thatlohna hria te leh, kan ramngaw venhimna dan tihdanglam a nih avanga kan ram leh ramngaw dinhmun derdep ta em em hrethiamtute thla a phang takzet a. “Inchi khat i pek chuan mel tam tak a la ang” tih hre reng chungin, saipui kal lai ang maia dan rual loha sawrkar puihna nena inpuahchahna kal but but chu thlirin, kan ram humhalh turin theih tawpin awrawl an lo chhuah ve mek a ni.
