Ka Pa Khuma chu enge a ei/in ang tihah a buailo a. A ui leh ar te leh an zavaia siamtu Pathian nen te chuan tu dang mahin kan hriatthiam puiloh hlimna a kawl ru ran a ni. Eng hna nge a thawh tih an zawh chuan, ni tla vanvuaia rim taka a thawh thuin a chhang a. Tin, “ka hausa” a tih ve dan pawh sum leh pai emaw lei rohlu lama hausakna thilte nilovin, nunin a ken tel engpawh lawm taka pawm thiam danah zawk a ni. A lungngaihna neih ve chhun pawh khuarel hram tin thiam leh ri mawi chitin rengten an hnem zawhloh rual a awmlo.
Chuti fakoa nun awhawm chu ngaisang turin kan infuih a. Thil engpawh lawm taka a pawm theihna chu finna tluk hialin kan chawimawi a ni. A retheihna chu chhamhla ril tak ang mai a ni a, a rianna pawh hlimna thuruk a ni. A ni, Ka Pa Khuma an tumna chuan rau leh thianghlim riauna a kengtel tlat—Mathaia ziakin tûktin par (lilies) leh chungleng savate lak ata lungkham neih sawtloh zia min zirtir ang khan (Mathaia 6:25-34).
Nimahsela, Mary Dawngi leh Saiwanah te hla ka han ngaihthlak rauh rauh khan, ka lairil hi zawhna pakhatin a mawh tlat roh pek a: Ka Pa Khuman chan tawka lungawi a zir avang hian intluktlanlohna khawvel zawk hi a lawm hlauh thung lo maw?
A thlamuanna chu a hlawhchhuah, a phuthawk ni ngeiin a lang a, a dik alawm. Mahsela, thlamuanna pawh hi hah rimtawngna tuammawina puan a ni thei a sin. Hlim leh lawmna te pawh, beiseina tihhnual a nih nawn fo hnua miten an neihchhun, an zir luih loh theihloh an ni thei. Mathaia ziak ang chiaha Ka Pa Khuman, “enge ka ei ang ka in ang tihah ka buailo” a tih khan, ka thinlung hian Marka ziaka ramhuai pai naupang rawn hruaitu, a rinhlelhnaa Isua puihna diltu kha a ṭawmpui tlat pek a (Marka 9:24), zawhna ka inzawt leh a ni—Ka Pa Khuma chuan a rinna avangin nge, hun rei tak beiseina a neih tawhloh avanga duhthlanna a neihloh avang zawk a heti anga sawi a nih ang le?
Ka Pa Khuma chu ni tla vanvuaiin thawk pawh ni se, hlawh reng reng a sawilanglo. Hausa inti teh reng pawh ni se, lei/lo ram man leh a neitute erawh sawilan a ni hauhlo; hnathawk leh hnathawk chhawrtu te, chumi aṭanga hlawkna changtu leh nei chuangliam te, thawh loh hlawh (surplus) leh thawh loh hnua hlawh te thleng pawhin; a sawilan lohna chhan inthup hi a awm ngei ang. A nih si chuan, a hlimna thuruk chu a ruk a ralin tu hian nge maw chhawr ta ber le? Ka Pa Khuman a thawh phu tawk hlawhlo ta se, a thar/thawhchhuah hralhna te neilo ta se, chuti ang chung chung chuan thlarau rahah ngaiin hlim ta tlat si sela, tu te emaw chu an mut tui phah sawtlo ang maw?
Ka Pa Khuma chanchin hian mawina leh, mite kherhthlu thei dawn dawn ril riauna a keng tel tlat alawm. Mahse hei erawh a ṭik chhete: Kan tawrhna te, kan retheihna te, hna kan hmuh theihlohna te hi a ve tur emaw kan tih a, kan pawm thiam ni la la hian chuti ang thlen theihna chhante chu kan ngaihven zui tawh ngailo a, siamṭhat tumna leh duhna kan nei ta ṭhinlo a ni.
Chuvang te pawh a ni ngei ang heti ang hla te hi an lar em em ni, intluktlanlohna khawvela kan chantawk kan lungawi pui thiam nan an ṭangkai em em si a. Motor khawl chak ṭhat nana grease ang mai an ni. Amaherawhchu, a motor ber hian kan mamawh a phur der bawk silo. Mi chuan a tawrhnaah hlimna a zawn a ngaih laiin a thlentute chu dawhsanah hlankai an ni thung a, chumi khawl (system) chuan theihnghilh a hlawh zui bawk a. Chung ang mi hlim zia chu han en teh! A thla a muang a, a rilru hahloh zia hi!
Keini hian Ka Pa Khuma kut benga kan lawm a, kan zawm dial dial hi a mak hranlo. Engmah chawkbuai ta hleilo chu; a hlimna thuruk hian kalphung awmsa a tidanglam theiloa, a malsawm zawk avang a ni. Keini pawh amah anga tihnuam leh thuawih mi kan ni.
Chuti ang chu kan tihmakmawh ve reng a ni em? Ka Pa Khuman a neih beitham tak a hlimna a chharchhuak thei hian ril ruk riauna chu a nei na mauh mai. Mahsela, mi hnuaihnung ṭhahnem takten an neih tlemte nena hlim luih an zir ngaihna chhan zawhna zawh ngamna pawh chumi tluk deuhthaw a ril a nihloh chuan, a pawimawhna chumi ai chuan a nep hran chuanglo e. Enga ti nge a neinung ten an thlân thlenga an phumbo pui tur awm ang hrima engkim deuhthaw an eiruk a, an choka pawh kan zawnchhuah hleih theihloh lai hian, a hnuaihnung ber berte hnen aṭanga hlim lui tura beiseina hi a nasat em em thung le?
A tlangkawm nan chuan, Ka Pa Khuma hi a zahawmlo in ka ring a ni hauhlo. A nun pawh hlim thei tak a nih ka ring. Mahsela, intluktlanlohna khawvel leh khâwl (system) hian amah anga mi hnuaihnung leh kuthnawthawktute, a khaichhuah ngai reng rengloh te hlimna leh zahawm luihnaah chuan fakna a lo hlawhchhuak ve tur a nilo. Ka Pa Khuma zahawmna leh lawm thiamna chu amah ang a hnuaihnung ve apiangin an entawn a, an tihmakmawh tura kan ngai a nih chuan, an tawrhna thlentute kan nghilh lui tihna a ni a; nachhawkna thawk theiloin khawtlang damlo kan enkawl a, inrahbehna leh hleihleinna te chu puan nalh leh hawihhawm takin kan thuammawi tihna a ni ang.
